தூத்துக்குடிக்கு கூடுதல் விமான சேவைகளுக்கு வாய்ப்பு : தூத்துக்குடிக்கு ஏர்பஸ் வகை விமானங்களை இயக்கவும், மும்பை, டெல்லிக்கு நேரடி விமானங்களை இயக்கவும் இண்டிகோ விமான நிறுவனத்திற்கு கனிமொழி MP கோரிக்கை..!
தூத்துக்குடிக்கு ஏர்பஸ் வகை விமானங்களை இயக்கவும், மும்பை, டெல்லி, கோயம்புத்தூர், ஹைதராபாத்திற்கு நேரடி விமானசேவைகள் வழங்கவும் தூத்துக்குடி MP கனிமொழி இண்டிகோ விமானநிறுவனத்திற்கு கோரிக்கை விடுத்துள்ளார்.
இது குறித்து அவர் இண்டிகோ விமான நிறுவனத்திற்க்கு எழுதியுள்ள கடிதத்தில் :-
"தூத்துக்குடி விமான நிலையத்திலிருந்து இண்டிகோ விமான நிறுவனம் தனது சேவைகளை வலுப்படுத்த வேண்டும் என்று நான் கேட்டுக்கொள்கிறேன். தற்போது, சிறிய விமானங்கள் இயக்கப்படுகின்றன, அவை அதிகரித்து வரும் பயணிகளின் தேவையை பூர்த்தி செய்யவில்லை. இரவு நேர தரையிறங்கும் வசதி கிடைத்தவுடன், இரவு நேர விமான நடவடிக்கைகளைத் தொடங்கவும், தற்போது பயன்பாட்டில் உள்ள சிறிய விமானங்களுக்குப் பதிலாக ஏர்பஸ் A320/321 போன்ற பெரிய திறன் கொண்ட விமானங்களை அறிமுகப்படுத்தவும் நான் உங்களை கேட்டுக்கொள்கிறேன்.
தூத்துக்குடியிலிருந்து மும்பை, டெல்லி போன்ற முக்கிய நகரங்கள் மற்றும் கோயம்புத்தூர், ஹைதராபாத் போன்ற தென்னிந்தியாவின் பிற வணிக மையங்கள் உட்பட பல இடங்களுக்கு நேரடி இணைப்பை விரிவுபடுத்தவும் நான் கேட்டுக்கொள்கிறேன். இந்த நடவடிக்கைகள் பயணிகளுக்கு கணிசமாக பயனளிக்கும் மற்றும் பிராந்தியத்தின் ஒட்டுமொத்த வளர்ச்சிக்கு உறுதுணையாக இருக்கும் " என தெரிவித்துள்ளார். இதனால் தூத்துக்குடிக்கு கூடுதல் விமான சேவைகளுக்கு வாய்ப்பு இருப்பதாக விமான நிறுவன தரப்பு அதிகாரிகள் தெரிவித்துள்ளனர்.
