தூத்துக்குடி வேலவன் ஸ்டோர் விவகாரம்: அனைத்து நகைகளிலும் தரக்கட்டுப்பாட்டு சோதனை நடத்த வேண்டும் சிபிசிஐடி விசாரணைக்கு உத்தரவிட வேண்டும் — தூத்துக்குடி மாவட்ட நாடார் இயக்கங்களின் கூட்டமைப்பு கோரிக்கை.!
தூத்துக்குடி மாவட்ட நாடார் இயக்கங்களின் கூட்டமைப்பு நிர்வாகிகள் கூட்டம் இன்று நடைபெற்றது. கூட்டத்தில் தூத்துக்குடி வேலவன் ஸ்டோர் தங்க நகைக் கடை தொடர்பாக கடந்த சில நாட்களாக சமூக வலைதளங்கள் மற்றும் செய்தி ஊடகங்களில் வெளியாகி வரும் பல்வேறு தகவல்கள் குறித்து ஆலோசிக்கப்பட்டது.
வேலவன் ஸ்டோர் நிர்வாகத்தினருக்கு சில ஜாதி அமைப்புகளைச் சேர்ந்தவர்கள் மிரட்டல் விடுத்ததாகவும் தகவல்கள் வெளியாகி வருவதாக கூட்டத்தில் தெரிவிக்கப்பட்டது. இதுகுறித்து உண்மை நிலையை முழுமையாக வெளிக்கொண்டு வர வேண்டும் என கூட்டமைப்பு வலியுறுத்தியுள்ளது.
நாடார் சமுதாயத்தைச் சேர்ந்தவர்கள் நேர்மையாக தொழில் செய்து வருபவர்கள் என்றும், எந்தவிதமான தரக்கட்டுப்பாட்டு சோதனைக்கும் எப்போதும் தயாராக இருப்பவர்கள் என்றும் கூட்டமைப்பு தெரிவித்துள்ளது.
எனவே, தமிழக அரசு இந்த விவகாரத்தில் உடனடியாக தலையிட்டு, தூத்துக்குடி வேலவன் ஸ்டோர் நிர்வாகத்தின் கட்டுப்பாட்டில் உள்ள வேலவன் ஜுவல்லர்ஸ் நிறுவனத்தில் விற்பனை செய்யப்படும் நகைகளின் தரத்தை உரிய அரசு தரக்கட்டுப்பாட்டு அதிகாரிகள் மூலம் சோதனை செய்து, அதன் உண்மைத் தன்மையை வெளிப்படையாக மக்களுக்கு அறிவிக்க வேண்டும் என கூட்டமைப்பு கோரிக்கை விடுத்துள்ளது.
இதன்மூலம் நாடார் சமுதாயத்தைச் சேர்ந்த தொழிலாளர்கள் மற்றும் தொழிலதிபர்கள் மீது தவறான கருத்துகள் அல்லது வன்மம் ஏற்படாமல் உண்மை நிலை வெளிச்சத்திற்கு வரும் என கூட்டமைப்பு தெரிவித்துள்ளது.
மேலும், வேலவன் ஸ்டோர் நிர்வாகத்திற்கு எதிராக ஜாதி ரீதியான தாக்குதல் மற்றும் மிரட்டல் நடவடிக்கைகளில் ஈடுபட்டதாகக் கூறப்படும் பி.எம்.டி. இசக்கி ராஜா என்பவர் மீது புகாரின் உண்மைத் தன்மையை விசாரித்து சட்டப்படி நடவடிக்கை எடுக்க வேண்டும் என்றும் கூட்டமைப்பு கோரிக்கை விடுத்துள்ளது.
இச்சம்பவங்கள் தொடர்பான முழுமையான உண்மை நிலையை கண்டறியும் வகையில், தமிழக அரசு உடனடியாக சிபிசிஐடி விசாரணைக்கு உத்தரவிட வேண்டும் என்றும், இதன்மூலம் இரு சமூகங்களுக்கு இடையே நிலவும் பதற்றமான சூழ்நிலையை தணித்து, அமைதியான சூழலை ஏற்படுத்த நடவடிக்கை எடுக்க வேண்டும் என்றும் தூத்துக்குடி மாவட்ட நாடார் இயக்கங்களின் கூட்டமைப்பு சார்பில் தமிழக அரசுக்கு கோரிக்கை விடுக்கப்பட்டுள்ளது.
